Åvtelen aalkah sïjse loggedh maahta væjsehke årrodh vaajteles gïelem bïejedh. Dam darjoeh gosse saeviegasse deadtah bijjemes sjeermen åelkiesbielesne.
Åvtelen maahtah aelkedh modellh sjugniedidh tjoerh sïjse loggedh. Jis dov lea google-facebook-apple-jallh feide-nuhtjije maahtah sïjse loggedh dejgujmie. Jallh maahtah sïjse loggedh Ludenso-utniejinie.
Loggh sïjse Ludenso-utniejinie
Ludenso-utnije ij baahtsemebaakoem krïevh juktie sïjse loggedh, guktie juvnehtibie aktem dejstie jeatjah sïjseloggeme-alternatijvijste nuhtjedh. Jis læjhkan sïjhth Ludenso-utniejinie sïjse loggedh, maahtah «Ludenso-utnije»-båalese diedtedh.
Jis aarebi leah sïjse loggeme Ludenso-utniejinie maahtah utnijenommem tjaeledh maam nuhtjih jïh diedtedh «logg inn». Jallh maahtah utnijem darjodh viehkine diedtedh «Registreerh jïjtjemdh».
Hoksh utnijenommem veeljedh mij lea sjïere, jïh gusnie ajve bokstaavh jïh taalh. Pryövh dov utnijenommem dan sjïere darjodh goh gåarede, vuesiehtimmien gaavhtan «Eivin» lea vuesiehtimmie akten nåake utnijenommese, mearan «Eivin23495» lea sagke buerebe. Dan mænngan maahtah jïjtjemdh registreeredh jïh sïjse loggedh gosse «registrer» deadtah.
Loggh sïjse Feidine
Juktie sïjse loggedh feidine datne voestegh dov skuvlem veeljh, diedtieh «velg tilhørighet», jïh dan mænngan deadtah «fortsett».
Tjaelieh utnijenommem jïh baahtsemebaakoem jïh diedtieh «logg inn».
Aalkoe
Voestes aejkien datne Ludenso Createm rïhpesth aktine vihties kontojne sïjhth faalenassem åadtjodh varke lïerehtimmien bïjre programmeste. Jis lea voestes aejkien datne programmem nuhtjh mijjieh juvnehtibie daam lïerehtimmiem tjïrrehtidh mij vaasa medtie 2 minudth.
Juktie jïjtjemdh Ludenso Createsne jårrehtalledh datne gårroeh snjearabåaloem diedtelh jïh snjearapeajhkem geasah. Juktie jïjtjemdh bealan jårrehtalledh datne snjearam bealan geasah, jïh jis edtjh bæjjese jïh våålese jårrehtalledh dellie snjearam geasah bæjjese jïh våålese.
Juktie sïjse jïh sistie zoomadidh datne snjearagaengkerem jårrh.
Juktie bïjre jarkan svihtjedh datne shift + gårroeh snjearabåalam diedtelh jïh snjearapeajhkem geasah. Juktie jïjtjemdh bealan svihtjedh datne snjearam bealan geasah jïh jis edtjh bæjjese jïh våålese sertedh datne snjearam bæjjese jïh våålese geasah.
Gosse 3D-hammosne barkeminie maahta væjsehke årrodh skaavhtem daamtaj jarkelidh dan åvteste maahta vååjnedh goh dah leah linjesne akten skaavhten mietie bielelen rïektesisnie seamma linjesne årrodh.
Jis naan aejkien skælkoeh sjïdth skaavhten gaavhtan maam vuajnah, maahtah gåatan diedtedh bijjemes gårroehbielesne juktie dov figuvrh rïekte åvtelistie vuejnedh.
Juktie orre figuvrh bïejedh datne menyjem gårroehbielesne nuhtjh.
Datne orre figuvrh bïejh viehkine dejtie diedtedh jïh dan mænngan sjugniedimmiesæjjan diedtedh, jallh diedtedh jïh dejtie olkese giesedh.
Jis saangerdh jïh ih sïjhth figuvrem bïejedh maam leah bïhkeme maahtah sjugniedimmiesijjien ålkolen diedtedh.
Maahtah orre figuvrh bïejedh aarebi figuvri nille viehkine snjearam dej figuvri bijjeli steeredh gosse orre figuvrh olkese geasah.
Jis dov leah jarkelimmieh mejtie ih leah vöörhkeme, vöörhkemebåala bijjemes gårroehbielesne sæjhta plaave sjïdtedh.
Maahtah vöörhkedh viehkine daan båalese diedtedh. Dellie gihtjelgovvh mejtie sïjhth modellese nommem vedtedh. Tjaelieh nommem jïh diedtieh vöörhkh. Geehth datne nommem nuhtjh maam ih leah joe nuhtjeme akten jeatjah modellese. Maahta aaj væjsehke årrodh nommem veeljedh mestie aelhkebe sjædta modellem gaavnedh mænngan. «Tjaetsiemolekylh» jallh «Mov nïekedsgåetie» leah hijven nommh.
Juktie modellem rïhpestidh mij joe gååvnese dellie dejtie golme sïevide deadtah eevre bijjemes gårroehbielesne.
Diedtieh dan mænngan «Modellh» menyesne gårroebielesne.
Dellie læstoem åadtjoeh gaajhki aarebi modelligujmie. Diedtieh «rïhpesth modellem» modellen nuelesne maam sïjhth rïhpestidh.
Maahtah figuvrem veeljedh viehkine dïsse diedtedh, maahtah vuejnedh figuvre lea veeljesovveme gosse tjeehpes gievliem sov bïjre åådtje. Maahtah jienebh figuvrh veeljedh seamma tïjjen.
Maahtah aaj jienebh figuvrh veeljedh viehkine burhtje-veeljeme-dïrregem nuhtjedh bijjemes åelkiesbielesne.
Gosse burhtje-veeljeme-dïrrege lea aktijve maahtah burhtjem sjeermesne giesedh mij sæjhta gaajhkh figuvrh burhtjen sisnjelen veeljedh.
Maahtah veeljemem aktede figuvreste båarhte vaeltedh viehkine don veeljeme figuvrese diedteh orresistie.
Gosse deadtah mïsse akt mij lij leah figuvre (vuesiehtimmien gaavhtan sjugniedimmiesijjie jallh duekie) gaajhkh veeljemh båarhte vaaltasuvvieh.
Juktie figuvrem sertedh tjoerh voestegh gaajhkh figuvrh veeljedh mejtie sïjhth sertedh. Geehth dov lea serteme-båala mij lea veeljesovveme menyjeste vöölemes sjeermesne.
Gosse geasah dejtie klaeriedamme njoelide maahtah figuvride sertedh njoeleotnjegen mietie.
Jis akten dejstie veeljeme figuvrijste deadtah jïh geasah, maahtah figuvride sertedh bahken mietie.
Jis sïjhth figuvride vielie veelelaakan sertedh maahtah moenedh gusnie figuvre edtja tjåadtjodh jis taalem tjaalah juktie veeljedh gåabph edtjh figuvrem bïejedh. Dam darjoeh gosse båalese deadtah vöölemes åelkiesbielesne.
Dellie golme teeksteburhtjh åadtjoeh mej sïjse maahtah taalem tjaeledh. Fïerhte taale maam sïjse tjaalah figuvrem beaja akten dejstie klaeriedamme njoeli otnjegisnie.
Juktie figuvrh jårredidh tjoerh voestegh gaajhkh figuvrh veeljedh mejtie sïjhth jårredidh. Geehth dan mænngan datne leah jårredimmiebåalam menyjeste veeljeme vöölemes sjeermesne.
Gosse dejtie klaeriedamme reagkide geasah maahtah figuvride jårredidh reagkan bïjre maam veeljh.
Jis sïjhth figuvride veelebelaakan jårredidh maahtah moenedh man jïjnjem figuvre jårredamme sjædta gosse taalem tjaalah juktie figuvren jårredimmiem veeljedh. Dam darjoeh viehkine båalese diedtedh vöölemes åelkiesbielesne.
Dellie golme teeksteburhtjh åadtjoeh mej sïjse maahtah taalem tjaeledh. Taalh mejtie sïjse tjaalah muenieh figuvren jårredimmiem dej klaeriedamme reagkaj mietie.
Juktie figuvrem stoeredahkem jarkelidh tjoerh voestegh gaajhkh figuvrh veeljedh mejtie sïjhth stoeredahkem jarkelidh. Geehth datne leah jarkelidh-stoeredahke-båalam menyjeste veeljeme vöölemes sjeermesne.
Aktine figuvrine veeljesovveme
Jis datne leah ajve aktem figuvrem veeljeme dov lea luhpie dam joekehts otnjegidie sigkedh gosse dejtie njieljieraedtine njoelide geasah.
Jis figuvrese deadtah jïh geasah maahtah abpe figuvrem stuerebe jallh unnebe darjodh.
Jis sïjhth figuvrem veelebelaakan giesedh maahtah moenedh man guhkie figuvre edtja sjïdtedh akten otnjegasse jis taalem tjaalah. Dam darjoeh gosse båalese deadtah vöölemes åelkiesbielesne.
Dellie golme teeksteburhtjh åadtjoeh mej sïjse maahtah taalem tjaeledh. Fïerhte taale maam sïjse tjaalah figuvren gåhkoem beaja akten dejstie klaeriedamme njieljienraedtien njoeli otnjegasse.
Jienebi veeljeme figuvrigujmie
Jis dov leah jienebh veeljesovveme figuvrh ih maehtieh dejtie giesedh akten otnjegasse, jis sïjhth gåabpegh akten otnjegasse giesedh tjoerh dan åvteste aktem dejstie veeljedh fïereguhten aejkien, jïh dejtie fïereguhtene haeresne giesedh. Maahtah jåerhkedh jienebh figuvrh stuerebe jallh unnebe darjodh fïereguhten aejkien viehkine don mïrhke burhtjese diedtedh gåabpegi objekti bïjre jïh giesedh.
Juktie aktem jallh jienebh figuvrh båarhte veeljedh datne voestegh figuvride veeljh mejtie sïjhth båarhte vaeltedh, jïh dan mænngan raatebæhtose diedtedh åelkiesbielesne.
Juktie aktem jallh jienebh figuvrh kopijeeredh datne voestegh figuvride veeljh mejtie sïjhth kopijeeredh, jïh dan mænngan kopijeereme-båalese diedtedh åelkiesbielesne.
Juktie klaeriedidh datne voestegh bæhtoebåalese deadtah.
Dellie åadtjoeh menyjem vuejnedh gusnie maahtah ovmessie möönsterh veeljedh, jis sïjhth aelhkie klaeride målsodh datne klaerierovtide deadtah. Jis sïjhth bååstede möönsteridie målsodh dellie don tjeehpes jïh veelkes movregierkie-möönsterasse deadtah. Mænngan gaervies klaeriedidh maahtah akten sæjjan diedtedh gusnie ij leah figuvre, juktie orrijidh klaeriedidh jïh klaerie-menyjem båarhte vaeltedh.
Möönsterh
Juktie möönsterem akten figuvrese bïejedh, dellie voestegh möönsterem læstoste veeljh (maahtah læstoem snjearapeajhkine giesedh juktie jienebh möönsterh vuejnedh) Mænngan möönsterem veeljeme datne figuvrese deadtah maam sïjhth klaeriedidh.
Klaerieh
Juktie figuvrese klaeriem vedtedh, datne voestegh klaeriem læstoste veeljh. Mænngan klaeriem veeljeme datne figuvrese deadtah maam sïjhth klaeriedidh.
Jis sïjhth sijjiem darjodh gusnie maahta gellie modellh joekehts almetjijstie vuesiehtidh, maahtah dåehkievuesiehtimmiem darjodh.
Juktie dåehkievuesiehtimmiem darjodh datne voestegh menyje-båalose deadtah eevre bijjemes gårroehbielesne.
Maahtah diedtedh «Orre dåehkievuesiehtimmie» mij sæjhta orre dåehkievuesiehtimmiem darjodh.
Jallh maahtah «Dåehkievuesiehtimmie» diedtedh sæjroemenyjesne. Dellie åadtjoeh læstoem vuejnedh gaajhki dov dåehkievuesiehtimmiej bijjeli, maahtah aaj diedtedh «Orre dåehkievuesiehtimmie» juktie orre dåehkievuesiehtimmiem darjodh.
Datne gihtjesovvh nommem vedtedh dåehkievuesiehtæmman. Tjaelieh maam sïjhth dåehkievuesiehtimmiem gåhtjodh jïh dan mænngan deadtah «Opprett gruppevisning». Geehth dåehkievuesiehtimmien nomme lea dan aelhkie guktie gåarede dam aelhkieslaakan gaavnedh mænngan, vuesiehtimmien gaavhtan «Eatnemefaage prosjekte, 9B, ruffien 2021» jallh «Arkitektuvre Tjeahpoe jïh vætnosne, goevten 2022».
Daelie leah dåehkievuesiehtimmiem tseegkeme. Fïerhte dåehkievuesiehtimmie sjïere kodam åtna man sïjse jeatjah almetjh maehtieh tjaeledh juktie meatan sjïdtedh vuesiehtimmesne. (Ih daarpesjh kodam mujhtedh, dïhte tjåadtjan sjædta bijjemes sæjrosne dan guhkiem dov dåehkievuesiehtimmie lea ræhpas).
Maahtah orrestimmienjoelide diedtedh gårroehbielesne juktie dåehkievuesiehtimmiem orrestidh. Jis naaken orre meatan sjidtieh dåehkievuesiehtimmesne, jallh naakenh dejstie mah joe leah meatan orre jarkelimmieh sijjen modellide vöörhkieh, maahtah daan båalese diedtedh juktie dagkerh jarkelimmieh dåehkievuesiehtimmesne vuesiehtidh. Mujhtieh ajve vöörhkesovveme jarkelimmieh dåehkievuesiehtimmesne vååjnoeh, daate sæjhta jiehtedh gaajhkesh mah ektiedimmiem utnieh dåehkievuesiehtæmman tjuerieh jarkelimmide vöörhkedh åvtelen dej jarkelimmieh dåehkievuesiehtimmesne vååjnoeh.
Jis joekehts modellide dåehkievuesiehtimmesne deadtah, sïjhth modellese zoomadidh mïsse deadtah.
Jis sïjhth jïjtjemdh dåehkievuesiehtæmman ektiedidh tjoerh ellen voestegh geehtedh datne leah dov modellem vöörhkeme.
Gosse modellem vöörhkeme maahtah dåehkievuesiehtimmie-båalese diedtedh bijjemes gårroehbielesne.
Tjaelieh dan mænngan gallerijen kodam mïsse sïjhth ektiedidh (koda lea bijjemes almetjen sæjrose mij ræhpas dåehkievuesiehtimmiem åtna).
Jïh diedtieh dan mænngan «Searvva».
Daelie sïjhth vuejnedh dåehkievuesiehtimmie-båalan klaerie lea klaeriem jarkelamme plaavese.
Jis daelie daan båalese deadtah maahtah doh jeatjah modellh vuejnedh dåehkievuesiehtimmesne. Maahtah orrestimmie-njoelide gårroehbielesne diedtedh juktie dåehkievuesiehtimmiem orrestidh. Jis naakenh orre meatan sjidtieh dåehkievuesiehtimmesne jallh naakenh dejstie mah joe leah meatan orre jarkelimmieh sijjen modellide vöörhkieh, maahtah daan båalese diedtedh juktie dagkerh jarkelimmieh dåehkievuesiehtimmesne vuesiehtidh. Mujhtieh ajve vöörhkesovveme jarkelimmieh dåehkievuesiehtimmesne vååjnoeh.
Jis joekehts modellide dåehkievuesiehtimmesne deadtah maahtah zoomadidh don modellese mïsse deadtah.
Diedtieh bååstedenjoelese gårroehbielesne juktie bååstede jarkedh jïh jïjtjedh modellem bigkedh.
